זאכן וועלכע רעגן מיר אויף!

האלטנדיג אינמיטן א טיפע דעבאטע אויפן טעלעפאן מיט מיין ידיד "באראק אבאמא". ווי כסדר ביי מיר, אים רופנדיג קיין וואשינגטאן צו געבן ראט.

באקום איך מיטאמאל א "ביפ", פון א אנאנימע נומער, עס האט מיר געגרילצט אבער דאך האב איך נישט געקענט לייגן דעם פרעזידענט אויף האלד, נאך וואס דער רופער האט נישט אויפגעהערט רופן, און איך האב זיך געהערט אפגעהאקט האט דער פרעזידענט געכאפט אז איינער רופט מיר און פארגעשלאגן אז "ער וועט ווארטן"... "פיק אפ די פאון" האט ער געזאגט, האב איך טראנספערירט די ליניע, און צו מיין שטוינונג איז דאס געווען א ראבאטישע רוף פון עפעס א רעדל פירמע פון סאוט קאראליינע, וועלכע רופט צו אנבאטן איבער א ספעשל וואס זיי אנאנסירן לכבוד די געבורט'סטאג פון די פירמע גרונדער.

ווער זענען זיי מיר צו רופן? פון ווי האבן זיי מיין נומער בכלל? אפשר באלאנגט מיין נומער פריוואט צו דאנעלד טראמפ? וואס טוען זיי דא? האקן א קאפ! וועם אינטערסירט זייערע רעדער פון דא ביז יאפאן.

א אויפברויז, א חוצפה איך האב תיקף אראפגעהאקט און דערציילט פארן פרעזידענט דערוועגן, ער האט דאס אויך נישט פארשטאנען.

איך מאך א קאנטראקט מיט א טעלעפאן פירמע אז זיי זאלן צולייגן מיין נומער צו א נערווירנדע עדווערטייזינג ליסטע? אפשר עגרי איך ניטאמאל צו די "טערמ'ס און קאנדישנ'ס וואס די קאמפאני רעזערווירט? האבן זיי מיין ערלויבעניש אז איך זאל געצעגערט ווערן יעדע שני וחמישי מיט אנדערע אנבאטן?

איך פארשטיי אז ווען דו ביסט אויפגעוואקסן אין דיין טאטנ'ס טירגארטן האסטו זיך צוגעקוקט און אקאמאדירט א אנדערע שיטה ווי עס איז אנגענומען.

איך פארשטיי זייער גוט דאס אז דו מיינסט אז ווי מער עקלדיג דו וועסט זיך אויפפירן אלס מער וועט דיר ג-ט רעספעקטירן.

איך פארשטיי אז דו ווילסט זיך פירן מיט ראדיקאלע שיטות, און דורכפירן דיינע טאטן טראץ וואס זיי זענען גרויליג.

איך פארשיי זייער גוט אז דיינע עקלהאפטיגע סעלפישנעס און טראכטן נאר פון דיר, קומט פון יארן וואס דו מאכסט חוזר חזרה אויפן "בשבילי נברא העולם", און דו קימערסט מיט אנדערע מענטשן ווי זיי זאלן ווען זיין צעקוועטשע ווערים.

אבער זיי וויסן אז א חזיר קען מען נישט זיין, און ווען דו ערשיינסט צו א שמחה קענסטו "נ-י-ש-ט" ארויסנעמען מיט דיינע בלויזע הענט, עסן פונעם טאץ.

יעצט זייענדיג ביי א בחורל'ס 13-טע געבורטסטאג סעלעבראציע, איז מיר אויסגעקומען צו מיטטיילן די זעלבע טיש מיט מענטשן וואס איך וואלט מיט זיי נישט געלערנט בחברותא, נעמענדיג עסן פון איין טאץ מיט מענטשן וואס איך וואלט פון זיי נישט געבארגט קיין געלט.

קומט אריין א אינגערמאן וואס פליעט צווישן גייסטער אין עולם הדמיון, עס איז נישט קלאר ווען ער דארף צו לאנדען, זיינע וועש זענען שמוציג, ער איז - ווי מען רופט דאס אין אנדערע ווערטער - א חאניאק, אבער א ראדיקאלער דערפון, אזאנס וואס וואלט געווינען דער פארמעסט ווען עס זאל זיין אזא זאך.

זאל ער זיין אראביש אפשטאמיג וואלט ער בלי ספק געווען א אימאם, א עקלדיגער כלי, איימסארי טו סעי, ווען איך גיב ווען די כללים פון זיין מענטשליך וואלט איך אים גענוצט אלס א מוסטער וואס צו נאכקוקן און טון גענוי אלעס פארקערט.

מיט די באקטיריע, און שמוציגע אנגעווארצלטע הענט פון וועמען עס רינען שטיקלעך פארטרוקנטע הויט, באגלייט מיט לענגערע רינעדיגע אפענע העמעדער וואס קוקן מיר אויס צו זיין א שטראף, דערנענטערט ער זיך צום טעצל פרוכט. נישט אז עס איז שוין געווען האלב ליידיג און שוין, נאר פארקערט, ער האט אנגעטראפן א אנגעפולט טעצל פון ג-ט'ס בעסט באשאפענע פרוכט, ווי א היגיענישע דורכפאל און דזשוירמס רעוואלוציאנער, האט ער גענומען די פינעוו פינגערס, און געפאנגען עטליכע שטיקלעך וואסערמעלאנע וואס האבן אזוי צו מיר געקוקט און געבעטן פוי, נעם מיך ארויס פון דא.

אנטשולדיגט מיין ידיד, מיין טייערע ערב, איך זאג עס ווייל עס טוט מיר וויי ביז די טיפענישן פון מיינע מענטשליכע אינסטינקטן, דו קענסט אזא זאך נישט טוהן, עס איז עטישלאז, אבסורד, עקלדיג, און אומפארשטענליך.

קיינער דארף נישט ליידן אז איר זענט פויל צו נעמען ווי א מענטש עסן, און איר קלויבט אויס די האנט וואס האט נארוואס געראטעוועט און ארויסגעקראצט א מייקראסקאפישע פליגעלע וואס האט זיך בטעות פארפלאנטערט אין די וויסטענישן פון אייער נעזל.

מיר ווילן עסן רואיג און געשמאק. איר זענט נישט ביי אייך אינדערהיים, און איר דארפט זיך אויפפירן ווי די סטאנדארט וואס ווערט אויפגעפאדערט פון מענטשן ארום אייך.

ביי אייך אינדערהיים, קענט איר עסן וויאזוי איר פארשטייט, און געדענקט נאר אז ווען מען שמירט אריין פישזאפט אין די גאטשעס דארף מען דאס דערנאך אויסוואשן.

אבער קומען אין פובליק, טרעטן אויף מענטשליכקייט, טון זאכן וואס די תורה פארבאט, עסן אומאיידל, איז נישט צום זאך, און עס איז אפילו נישט רבניש.

עס זענען דא ספעציעלע געצייג וואס הייסן לעפלעך, גאפלעך, און מעסערס, וועלכע העלפן דעם מענטש זיין זויבער, עס העלפט צו זיין ריין, און איז געמאכט פאר אט די סיבה, נעמליך, איר זאלט קענען עסן און נישט צושטערן די שמחה פון אנדערע מענטשן וואס ווערן רואינירט ביז ברעכן ווען זיי זעען די סארט סצענעס.