ער טרייבט נאר איבער מיטן חלק אז מען האט נישט מתפלל געווען. איך אליין האב געזאגט תהלים פאר אים. אבער קבל האמת ממי שאמרו. ער האט ריכטיגע און זאכליכע טענות אויך.
מפני חיבת ההספד והדברי מוסר בין איך עס דא מעתיק.
פרישערווי זאל איך אנהייבן, זאל איך קודם רעדן פון די צער פון די אינגערמאן, וואס איז ארויסגעריסן געווארן פון די חבריי'ה, אינמיטן זיינע שענסטע יארן, זאל איך וויינען אויף זיין אינגע אלמנה, וואס איז אזוי פליצלינג נהפכה הקערה על פיה, זאל איך קלאגן אויף די אכט אינגע יתומים וואס זענען נאך נישט חתונה געהאט, זאל איך וויינען פאר זיינע אלע חברים וואס האבן פארלוירן זייער שמייכל געיבר, זייער עי-טי-עם מאשין ווי די אנטיסעמיטישע און רשעותדיגע נ"י פאסט שר"י האט מעיד געוועין, ווי נעמט מען די שרעקליכע פאסירינג און מען לייגט עס אויף פאפיר, עס איז נישט דא קיין ווערטער אים צי באשרייבן, א איש החסד, א איש המעש, א אפען הארץ פאר יעדען, געוועין זייער א פארנימענער מאן, אבער נישט געניג פארנימען צי פארלירן זיין שמייכל, וואס איז געוועין געשמידט צי זיין געזיכט, יעדער וואס איז געקימען מיט אים און בארירינג האט געשפירט מיט אים נאנט, מי יתן לנו תמירתו, וואס ברויכן מיר זיך ארויס נעמען פון אזא פאסירינג, וואס ברויכן מיר אנדערש טיען, וואס האט מנחם געטיען נישט גיט, ער האט דאך גארנישט געטיען וואס קיין אנדערער האט נישט געטיען.
כך גזרה חכמתו, מיר קענען נישט פרעיגן קיין קשיות וואס מען קען נישט פארענטפערן, מיר ברויכן נישט קיין תשיבות, מיר זענען און גלות, אינטער די יאך פון פרנסה, אינטער די יאך פון רשעי ישראל, רשעים וואס רייצען אן אויף אינז מערדער, עכרי ישראל וואס שארפן זיך ציין און נעיגל אפילו ווען דאס בליט זידעט נאך, קענען נישט איינהאלטן זייער בלינדע שנאה אפילו ביז נאכן סתימת הגולל, איך מיין נישט בדווקא די נ"י פאסט, איך מיין נאר די רשעים ביננו שלעכטע אימפארגינערישע פארשוינען, מענטשען וואס זענען עובר אויף לא תחמוד בית רעיך, אדער לשון הרע, רכילות און נאך צאלאזע שלעכטע מידות מעכרת, אפילו ווען ער איז פארלוירן און אנגעוויזן אויף אינזער הילף, קענען מיר זיך העלפען און אויף קימען מיט רשעות'דיגע מיינינגען, ער האט שלעכטע ריוויאס אויף יעלפ.קאם, ער איז א סלאם לארד, האט דאך באגנב'ט זעכציג מיליון, ער האט אוועק גענימען א ביסן פון א באנק'ס מאהל, ער איז מחייב לא עלינו ככל אשר יעבור עליו תחת השמש, אדער אפילו ארים שיקען ווייטער אזעלכע שעידליכע מיינינגען.
וואס איז פליצלינג מיט עס איז געוועין אזוי באשערט? רבותי ווי איז אינזער אהבת חנם, ווי איז אינזער צער און עגמת נפש, ווי איז אינזער קרעכץ פאר א איד, וויפיל האבן נישט געקענט שלאפן באנאכט פאר מנחם'ס אנגסט, וויפיל האבן פארלאזט א טרער ווען מען האט געזעין דאס שוידערליכע מציעות אז מען האט אים פארכאפט, פארוואס איז נישט געוועין קיין איין בקשו רחמים צעטל און שטאט נאר אויפן טריפה'נעם כלי, פארוואס זענען נישט געוועין קיין מניני תהילים פאר זיין טובה וועיגן ארים די זייגער, מיר האבן פארלוירן אינזער זיק כל שהוא איד, אינזער שטאלץ אז מען העלפט אן אנדערן איד אן קיין מחשבות זרות איז פארביי, איך ציטער וואס מען וואלט געזאגט אויף מיר ווען עס וואלט פאסירט מיט מיר, יעדע שלעכטע מעשה שבדה מליבם ליפטערט מען, יעדען שטיקל אינפארמאציע ווערט אויסגעדראשן, אזש אז די רשעותדיגע פאסט קען נאך זאגן אינפארמאציא פון די געיגענט,
ווען א איד וואס האט נאך נישט שלעכט געטיען פאר קיין זעהל אויף דער וועלט ווערט פארלוירן עטליכע וואכן ציריק, אנשטאט מיר זאלען זיך ארויס לאזען זיכען אזוי ווי מיר פלעיגן טיען ביז נישט לאנג ציריק, איז דער תירוץ ווי זאל איך זיכן, אין זיין קאר? אבער מען פארגעסט אז זיין קאר איז געוועין א מאביל הכנסת ארחים שטיבל, וואס איז געוועין אלע מאל גרייט על כל אורח פורח שיבוא, פארוואס זענען מיר אזוי לעקטערזירט געווארן איש על טעלעפאניתו, וקאמפיאטריתו, ווען האט דאס פארסירט, ווי האבן מיר פארלוירן אינזער רחמנים בני רחמנים, ציגיין און ציפיצעלט ווערן פאר א אנדערן איד, דאס ברויכן מיר זיך מקבל זיין, מיר וועלן נישט לאזן דעי אימגליק גיין פארביי אן א שטארקע קבלה על העתיד, מיר וועלן דערווארעמען אינזערע הערצען פאר יענעם, מיט דעים זכות גיימער בקרוב ארויס פון גלות, מיר וועלן נישט קיקן אויף אנדערע אידן מיט פארדאכט, ווען א איד איז און א עת צרה, קיקן מיר מער נישט אז ער איז דאך געוועין א משהו שילדיג אליין, על כן מיז ער זיך אליינס ספראווענען, מיר מאכן מער נישט קיין חשבונות אויף א אנדערען איד.
הרינו מקבל עלי מצות עשה של ואהבת לרעך כמוך, מיר וועלן זיך אויף פירן מיט א אנדערען איד די זעלבע וועיג ווי מען וואלט געוועין שטאלץ אז אנדערע פירן זיך אויף מיט אינז אליינס, שטעלט אייך פאהר ווען מנחם ע"ה באווייזט זיך, און קיקט אויף וואץ עפפ גרופעס, טוויטער, וואס עס איז אלס געליפטערט געווארן דורך אחינו בני ישראל און די גוים, אדער ווי גארנישט כלל ישראל האט געטיען אים צי ראטעווען, וואלט ער דאך תיקף ומיד אויסגעהויעכט זיין נשמה, לאמיר דאס נישט לאזן פאסירן נאכאמאל, און דאן וועט זיין ומחה השם אלקים דמעה מעל כל פנים.
