דערנאך האט רבינו שליט"א אפגעשטאטעט א באזוך ביי הגאון רבי דוד סאלאווייטשיק שליט"א ראש ישיבת בריסק, וואו עס איז פארפירט געווארן א שמועס איבער ענינים העומדים על הפרק ובעיקר איבערן ביטערן גזירת הגיוס. הגאון ר' דוד שליט"א זיך אויסגעדרוקט אז דער רבי שליט"א איז פון די איינציגסטע גדולי ישראל וואס שרייען שוין אזוי לאנג אז די גזירה איז א ביטערע גזירה, און מען דארף ווייטער זעהן מעורר צו זיין אידישע קינדער און אויפרודערן די וועלט, צולייגנדיג אז ער האלט אז עס איז שוין צייט פאר די בני א"י זיך אוועקצוציען פון לאנד, און די רבי האט געזאגט אז נאר מיטן כח פון מסירת נפש וועט מען טאקע קענען איבערקומען אזא גזירת שמד.
📎 ר' דוד.jpgפון דארט איז מרן רבינו שליט"א געפארן צום הר נוף געגנט אין ירושלים, וואו דער רבי האט באזוכט ביי הגאון האדיר ראב"ד ירושלים שליט"א וואו דער ראב"ד האט איבערגעגעבן פאר'ן רבי'ן זיין נייעם ספר וואס איז נארוואס ערשינען לאור עולם. און עס האט זיך פארצויגן א הלכה'דיגער שמועס איבער דעם זמן השקיעה ווען מ'דארף מקבל שבת זיין אין געגנטער וואס זענען ארומגענומען מיט הויכע בערג.
📎 ראב''ד.jpgדערנאך האט דערנאך האט זיך מרן רבינו שליט"א פארשפארט מיט הגאון הראב"ד שליט"א פאר א לענגערע צייט.
דאן איז רבינו שליט"א ערשינען צום צום גרויסארטיגן מעמד חנוכת הבית לרגל די אויפבוי פונעם נייעם הערליכן בנין הת"ת. אין זאל פון נוה ירושלים. וואו עס האבן זיך באטייליגט די חברי הבד"ץ העדה החרדית, ובראשם הגאב"ד והראב"ד שליט"א, האדמורי"ם מדושינסקי, תולדות אהרן, טשאקאווא, קהל חסידי ירושלים, פינסק קארלין, הרה"צ המשפיע רבי יעקב מאיר שעכטער, הרב דקהל פרושים, שליט"א, און נאך.
צום ערשט האט אויפגעטרעטן הגה"צ דומ"ץ דקהילתינו שליט"א פון ירושלים, וועלכער האט מקבל פנים געווען דעם רבי'ן בשם די גאנצע קהילה, און ארויסגעברענגט דעם וואוקס פון די קהילה בליעה"ר וואס איז א גירא בעינא דשטנא, וואס אפילו ווען רבינו שליט"א געפונט זיך אין אמעריקא איז דער רבי פארבינדן מיט אונז, און מיט זיינע כוחות האלט זיך דער גאנצער ציבור.
דערנאך האט דער דיין שליט"א אויסגערופן דעם פוסה"ד הגאון האדיר ראב"ד ירושלים שליט"א, דער ראב"ד שליט"א האט צום ערשט באגריסט דעם רבי'ן מיט'ן ברכת ברוך הבא בשם ה', און ער האט ארויסגעברענגט אז מה' מצעדי גבר כוננו אז דער רבי וואס איז געקומען יעצט צוליב א חתונה איז אנגעקומען אין די זעלבע צייט וואס די רשעי ישראל זיצן און פארענדיגן די ביטערע גזירת הגיוס, און אין אזא זמן דארף דער עולם אין א"י אסאך חיזוק.
דערנאך האט רבינו שליט"א אויפגעטרעטן מיט א פייערדיגע דרשה, וואו דער רבי האט צום ערשט ארומגערעדט איבער דאס מסירת נפש נישט נהנה צו זיין פון די טריפה'נע געלטער ממקורות זרים, זאגנדיג אז נאר אזוי איז מען זוכה צו אזא כח הקדושה און מען דארף דעריבער מחזק זיין די אלע וואס לאזן זיך קאסטן אונטערצוהאלטן דעם הייליגן וואגן, און דערנאך האט דער רבי געזאגט אז קומענדיג קיין ארץ ישראל איז אנגעקומען די בשורה לא טובה איבער די פרישע שטאפלען פון דעם גזירת הגיוס, ביום הזה הובקעה העיר, און די רבי האט ארויסגעברענגט אז די רשעים האבן זיך פארלייגט אויסצורייסן די תורה ולהעבירם מחוקי רצוניך. און דער רבי האט געטייטשט דעם דרש פון חז"ל "שתשים סנהדרין אצל המזבח" אז סנהדרין איז מרמז אויף לימוד התורה, און דער מזבח איז מרמז אויפ'ן עקידת יצחק, און אויב וויל מען קענען לערנען און היטן די הייליגע תורה דאן דארף מען שטענדיג געדענקען די מסירות נפש פון די אבות ביי די עקידה, ווייל נאר מיט מסירת נפש קען מען זוכה זיין זיך צו האלטן און איבערקומען די אלע שווערע גזירות, קיין שום אנדערע וועג נוצט נישט אויסער מסירת נפש וואס דאס האבן אונזערע עלטערן געטוהן.
דער רבי האט אויסגעשריגן פאר די בני ארץ ישראל אז דער יהדות החרדית אין חוץ לארץ שטייען צו זייער רעכטע זייט אין דעם מערכה, מען טוט און מען וועט ווייטער טוהן אלע מעגליכקייטן צו שטורעמען קעגן די ביטערע גזירה, און די אידן פון ארץ ישראל און פון חוץ לארץ טוען אינאיינעם אויסשרייען דעם "שמע ישראל ה' אלוקינו ה' אחד" אויסרופנדיג אז מיר זענען גרייט צו טוהן אלעס צו ראטעווען אונזער הייליגער עתיד.
דערנאך איז מען ארויס אין התרגשות'דיגע ריקודין לויבנדיג דעם אויבערשטן ברוך הוא אלקינו שבראנו לכבודו והבדילנו מן התועים ונתן לנו תורת אמת. ביים ענדע האט רבינו שליט"א באגריסט אלע רבנים המשתתפים און פארלאזט דעם זאל בשעת דער עולם האט ממשיך געווען מיט די פייערליכע געזאנגען. אויפ'ן וועג ארויס זענען אנגעקומען האדמורי"ם מראחמסטריווקא ולעלוב, און רבינו שליט"א האט זיי באגריסט און דורש געווען בשלומם.
נאך דעם מעמד חנוכת הבית האט רבינו שליט"א אפגעשטאטעט א באזוך אין שטוב פון האדמו"ר מגור שליט"א, וואו עס האט זיך אנטוויקלט א שמועס איבער דעם שרעקליכן גזירת הגיוס וואס ברענט יעצט אויפ'ן סדר היום אין ארץ ישראל.
פון דארט איז רבינו שליט"א צוגעפארן צו די אכסניא בבית הרבני הנגיד ר' אשר זעליג לעוו הי"ו, יו"ר הנהלת מוסדות יטב לב באייראפע, וואו דער רבי האט געדאווענט מעריב און זיך אפגערוהט פאר א קורצע וויילע.
דערנאך איז רבינו שליט"א אנגעקומען צום מסיבת חנוכת הבית פון הרבני הנגיד ר' מאיר זעליג ריספלער הי"ו פאר די נייע "מקוה אליעזר דוב" אין די בתי אונגארין וואס ער האט מנדב געווען לע"נ זיין שווער הרה"ח ר' לייזער בער דייטש ז"ל.
דער רבי האט דארט אויפגעטרעטן מיט א דרשה נאכברענגנדיג מפי ספרים וסופרים בגודל הענין פון גיין אין מקוה יעדן טאג וואס דאס איז סיי א טהרה אויפ'ן עבר און סיי א שמירה אויפ'ן עתיד. און דער רבי האט ארויסגעברענגט בשבחו פונעם נדבן שליט"א וואס האט זיך שוין געלאזט קאסטן לטובת הכלל בעבר, ביים בנין הבית רחל אין וויליאמסבורג און דער בנין הביהמ"ד אין קרית ויואל משה מאנטיסעלאו, ועוד ידו נטוי' אויפצובויען א פראכטפולע חתונה זאל אין וויליאמסבורג צו קענען צושטעלן א חתונה זאל פאר'ן היימישן ציבור פאר א ביליגן פרייז.
באזונדער האט דער רבי דערמאנט לטובה דעם שווער פונעם נדבן הרה"ח ר' לייזער בער דייטש וואס על שמו איז די מקוה געבויעט געווארן. ר' לייזער בער איז געווען א שכן טוב לאנגע יארן פאר רביה"ק בעל ברך משה זי"ע אין וויליאמסבורג, און א מתפלל קבוע אין דעם סיגוטער ביהמ"ד. און דער רבי האט מסיים געווען מיט ווארימע ברכות פאר'ן חשוב'ן נדבן ר' מאיר זעליג הי"ו.
נאכדעם האט דער רבי באזוכט ביי מחותנו האדמו"ר מדושינסקיא שליט"א, פאר וועם דער רבי האט איבערגעגעבן א גרוס פון די קינדער און אייניקלעך, ווי אויך האט מען גערעדט איבער די סדרי הישיבה און סיפורי צדיקים.
📎 דושינסקיא.jpgדערנאך האט דער רבי באזוכט ביי האדמו"ר מתולדות אהרן שליט"א וואו עס האט זיך אנטוויקעלט א הערליכער שמועס בסיפורי צדיקים. און מיט דעם האט זיך געענדיגט דער סדר היום פון מיטוואך, ארום 1:00 ביינאכט.
📎 תו''א.jpgדי ווייטערדיגע באריכט וועט אי"ה נאכפאלגן.
-עומדות היו רגלינו בשעריך ירושלים-
•♦•
אצינד אויפדערנאכט – א"י צייט – ווערט געפייערט די חתונה הגדולה בחצרות קדשינו אין די זאלן פון לב האצולה אין פתח תקוה.
פאלגט נאך די ווייטערדיגע מעלדונגען און באריכטן.
-קול רנה וישועה באהלי צדיקים-
📎 ר' דוד.jpg 📎 ראב''ד.jpg 📎 תו''א.jpg
