קרעדיט: הקריה טבת תשע"דהיסטארישע ״אנעקסעישאן אפליקאציע אריינצונעמען פרישע 800 אקער לאנד אין קרית יואל אריינגעגעבן געווארן
אריין געגעבן דורך ועד הקריה צום טאון אוו מאנרא און ווילידזש אוו וואודבארי - בלויז דאס צווייטע מאל אין די היסטאריע פון קרית יואל, נאך איבער דרייסיג יאר פונעם פריערדיגען ״אנעקסעישאן״ פראצעדור - נייע שטחים וועלן האבן פלאץ צו פארטאפלען בעז"ה די צאל פון משפחות אין קרית יואל
עס איז שוין אריבער א קיילעכדיגען יאר פון ווען דער ״הקריה״ האט געבראכן די נייעס איבער די פלענער אנצוהויבן מיט אן היסטארישען פראצעדור וואס איז באקאנט אלס ״אנעקסעישאן״, ווען עס האבן זיך בשעתו פארמירט א פארבאנד פון לאנד-אייגנטומער ארום די גרעניצן פון קרית יואל אין שפיץ פון וועד הקריה, אריינצוגעבן א געמיינזאמען אפליקאציע צו די ארומיגע טאון אוו מאנרא און ווילידזש אוו וואודבארי, און צו די קרית יואל ווילעדזש באאמטע, מיט א פארלאנג אריינצונעמען זייערע שטחים אין די גרעניצן פון קרית יואל.
יעצט קומט אריין די פרייליכע בשורה, אז מ'האלט שוין אט אט ביי די פרשה פון כי ירחיב ה׳ את גבולך, ווען דער מעגא-אפליקאציע איז געווארן אריינגעטראגן צום טאון אוו מאנרא/ ווילידזש אוו וואודבארי, און צום ווילידזש אוו קרית יואל, פארלאנגדיג פון די טאון/ווילידזש באורד צו אויטאריזירן און אריבערפירן ארום אכט הונדערט אקער-לאנד, וואס איז יעצט אונטער די דרויסענדע מוניציפאליטעטן, אריינצוקומען אינערהאלב די גרעניצן פונעם ווילעדזש פון קרית יואל.
אינעם הקריה חודש טבת-שבט תשע״ג העעל״ט, האבן מיר געברענגט פאר די חשוב׳ע ליינער א לענגערע און היסטארישע איבערזיכט, פונעם גרינדונג און שאפונג פון די ״ווילעדזש אוו קרית יואל״ בשנת תשל״ז בעידודו ובברכת קדשו פון רבינו הקוה״ט זי״ע, און שפעטער בשנת תשמ״ג עטליכע יאר נאכדעם וואס רביה״ק בעל ברך משה זי״ע האט איבערגענומען דעם שבט ההנהגה ווען דער ווילעדזש האט פילפאכיג פארברייטערט אירע גרעניצען, און אזוי ארום ערמעגליכט אז קרית יואל זאל קענען וואקסן צו די גרויסקייט בליעה״ר אין וועלכע די שטאט געפונט זיך היינט.
די פארגאנגענע פאר יאר האט די געטרייע הנהלת הקריה איינגעזעהן, אז די שטאט טוט זיך שוין אט דערנענטערן צו א מצב ווען די גרעניצן וועלן ווערן אויסגעוואקסן, און אויב וועט נישט אונטערגענומען ווערן קיין שריט צו פארברייטערן די ווילעדזש גרעניצן, קען דאס באדייטן אז דער בליה און וואוקס פון די הייליגע שטאט זאל קומען צו א שטיל-שטאנד חלילה וחס, נאכדעס וואס די שטחים ארום קרית יואל געפונען זיך אין זאונינג גרעניצן וואו די בוי- געזעצן זענען בכלל נישט גונסטיג פאר די געברויכן פון קרית יואל, אזוי אויך זענען נישט פארהאן קיין רעגירונגס געפירטע וואסער סיסטעם, און אנדערע שליסל סערוויסעס צו קענען אנטוויקלען די שטחים פאר נויטיגן געברויך.
בלויז צו אילוסטרירען דעם צוקונפטיגען געברויך אין ציפערן, איז גענוג אנצוצייגן דער מספר פון מיידלעך היינט צוטאגס תשע״ד אין קרית יואל, פון ניי-געבוירענע מיידלעך ביז צו די חתונה, שטייט עס היינט ביי ביילייפיג 8,000 בליעה״ר כ״י, דאס מיינט אז אין בלויז די קומענדיגע אכצן יאר הבעל״ט, וועט אויספעלן אין קרית יואל א סך הכל פון אכט טויזנט דירות, און דאס נעמט נישט אריין די צאל משפחות וועלכע ציען זיך יערליך ארויס קיין קרית יואל פון אויסער די שטאט.
דערויף האט די הנהלת הקריה זיך אריינגעלייגט אינעם פארצווייגטען פראצעדור וואס איז באקאנט מיט איר צויבער-נאמען ״אנעקסעישאן״, וואס אין בוכשטעבליכען זין פון ווארט טוט דאס באדייטן אז דער ווילעדזש וועט אנעקסירן און אריינעמען פרישע שטחים אין אירע גרעניצען, וואס די נייע שטחים וועלן פון נאכן אנעקסעישאן באקומען די זעלבע סטאטוס וואו די ביז יעצטיגע שטחים וואס קרית יואל פארמאגט, און אזוי ארום וועט דאס ערמעגליכען דעם צוקונפטיגען נאטורליכען וואוקס בעזהשי״ת, פון די קומענדיגע יארן.
יעדע אנעקסירונג פראצעדור נעמט שטענדיג אריין דריי הויפט שפילערס; די מוניציפאליטעט פון וואו די שטחים גייען ארויס (אין דעם פאל טאון אוו מאנרא און ווילידזש אוו וואודבארי), דער שטח אייגנטומער (דער ׳אפליקאנט׳), און די מוניציפאליטעט צו וועלכע דאס לאנד ווערט אנעקסירט (און אונזער פאל, דער ׳ווילידזש פון קרית יואל׳), דער אפליקאנט גיט אריין זיין פארלאנג צו די צוויי אנדערע צדדיס, וועלכע ברויכן דאס באשטעטיגן.
דער ״וועד הקריה״ האט דאן פארמירט א פארבאנד פון לאנד- אייגנטומער אינדרויסן פון קרית יואל, וועלכע האבן אן אינטערעסע אריינצוקומען אינעם ווילעדזש, צו ארבייטן אונטער א געמיינזאמער אפליקאציע, און אזוי ארום האט מען אנגעהויבן אויסצוארבייטן אן ״אנעקסעישאן מאפע״, ווען מען איז געזעצן מיט יעדן לאנד אייגנטומער באזונדער און אדורכגעגאנגען מיט זיי די פארשידענע דעטאלן און פארפליכטונגען וואס קומט מיט מיט די אנעקסעישאן פראצעדור
און אזוי האט זיך אנגעהויבן צו אנטוויקלען דער היסטארישער שריט, ווען בלויז דאס צווייטע מאל אין די פערציג יעריגע היסטאריע פון קרית יואל, וועלן די גרעניצן פון די שטאט בעז״ה ווערן פארברייטערט. ווי נאר די מאפע איז געווארן גרייט, אריינעמענדיג אין זיך אזויפיל ווי אכט הונדערט אקער-לאנד, זענען אנגאזשירט געווארן געניטע אדוואקאטן און עקספערטן צו באטראכטן דעס אפליקאציע און די פארגעשריבענע מאפע, זיכער צו מאכן אז אלעס איז אויסגעהאלטן לויט די סטעיט פארשריפטן און געזעצן.
אין לויף פון די פארגאגענגענע חדשים האבן די מומחים געניטליך אדורכגעטאן די אפליקאציע, און גרונטליך איבערגעגאנגען די מאפעס, ווען די עקספערטן מאכן פארשידענע רעקאמענדאציעס און צייכענען אן געוויסע קאמענטארן וואס ברויך גענומען ווערן אין באטראכט, איידער דער פראצעדור גייט אריבער צוס קומענדיגען שטאפל.
בחסדי השם איז היינטיגן פרייטאג עש״ק פ׳ וארא, דער פראצעדור געגאנגען פאראויס ווען דער ״אנעקסעישאן אפליקאציע״ איז אריינגעגעגעבן געווארן דורך די לאנד אייגנטומער צום טאון באורד פונעם טאון אוו מאנרא, און דערויף די באזונדערע אפליקאציע צום ווילידזש אוו וואודבארי, און גלייכצייטיג אויך צום קרית יואל ווילעדזש באורד, צו פארלאנגען זייער באשטעטיגונג אז די דערמאנטע אכט הונדערט אקער-לאנד זאל ווערן אנעקסירט פונעס טאון צום ווילעדזש.
לויטן געשאצטן פראצעדור, אויב וועלן נישט אונטערקומען קיין אומפאראויסגעזעענע שטרויכלונגען, קען געדויערן צווישן זעקס ביז ניין חדשים, ביז ווען די טאון און ווילידזש זאלן ענדגילטיג באשטעטיגען דעם אנעקסעישאן, וואס דאן וועלן די אנגעצייכנטע שטחים אפיציעל אריבערגעשריבן ווערן צו די גרעניצן פון קרית יואל בעזהשי"ת.
די פארגעשריבענע מאפע נעמט אריין שטחים פון עטליכע פונקטן ארום די גרעניצן פון קרית יואל, אנגעהויבן ביים קאונטי ראוד 105 און ביים ווינקל פון בעיקערטאון און עיקרס ראוד, וואו די שטחים פונעס גיגאנטישען ״עיס פארם״ באדן וועלכע גרעניצט זיך מיט די יעצטיגע שכונת ברך משה וועלן אי״ה אריינגענומען ווערן אין קרית יואל (טייל שטחים געפונען זיך אויף טאון אוו מאנרא לאנד, און טייל שטחים זענען אין די ווילידזש אוו וואודבורי גרעניצן).
קרית יואל וועט זיך אויך פארברייטערן לענגאויס עיקערס ראוד, ווען די זייטיגע באדנס אנגעהויבן פון בעיקרטאון ראוד, ביז צו לעמבערג און פארעסט ראוד, זענען אנגעצייכנט אויף די ״אנעקסעישאן מאפעס״, און דאס גייט ווייטער אויף מאונטען ראוד פון פארעסט ביז אקעגן איבער טעיטש און ארויף ביז צו די חברון און ראוונע גאסן, ווען די נייע הייזער וועלכע ווערן געבויעט אלס טייל פון די ״ווינטעדזש וויסטע״ פראיעקט, וועלן אריינגענומען ווערן אין קרית יואל.
די צוגעלייגטע שטחים ציען זיך ווייטער אויף די לינקע זייט פון די מאפע אויף קאונטי ראוד 44, וואו פילע אקער-לאנד וועלן ווערן אנעקסירט צו ווערן א טייל פון קרית יואל.
און אזוי אויך אויף ביידע זייטן פון סעווען ספרינגס ראוד אונטער שכונת עצי תמרים און אראפ ביז צום ״ראפשיץ געגנט״, וועלכע נעמט אריין די גאסן; מאונטענוויו, איירין, טאובי פלעיס און רעיוואוד דרייוו, ביז צוריק אין קרית יואל אויף סקאנעמאנק ראוד ביים שטח פונעס בית החיים דקהלתינו, און אויף פארעסט ביים קארנער פון ד. א. ווידער בלווד.
ווי דערמאנט איז די רעדע פון א ריזיגע שריט אין די היסטאריע פון קרית יואל, וועלכע ווערט אונטערגענומען דורך די געטרייע הנהלת הקריה, בהסכמתו ובברכת קדשו פון כ״ק רבינו שליט״א דער מרא דאתרא פון די הייליגע שטאט, אונטער וועמענס רוחניות׳דיגע סמכות וועלן די ביז יעצטיגע ״גלילות קרית יואל״ ווערן אנטייל פון ״קרית יואל המורחבת״ בעזהשי״ת.
לויט פארשידענע שאצונגען קענען די צוגעלייגטע שטחים אריינעמען אין זיך פילע טויזענטער נייע מעגליכקייטן פאר דירות, וואס אין אנדערע ווערטער טוט דאס באדייטן, אז די נייע שטחים וועלן ערמעגליכען צו פארדאפלען די היינטיגע ציפערן פון משפחות וואס וואונען אין קרית יואל, וועלכע געפונט זיך היינט צוטאגס אויף א שטח פון ביילייפיג זיבן הונדערט אקער-לאנד, זינט די פריערדיגע אנעקסעישאן בשנת תשמ״ג.
עס איז געוויס א בשורה טובה פאר אלע תושבי קרית יואל, און תלמידי וחסידי סאטמאר פון איבער די גאנצע וועלט, צו הערן אז דער הייליגער סאטמארער שטעטל וואס מרן רבינו הקוה״ט זי״ע האט מייסד געווען בשארית כוחותיו, און געשטעלט אלס א יסוד מוסד פארן עקזיסטענץ פון דאס פשרה-לאזע אידישקייט על אדמת אמעריקא ביז משיח׳ס טאג, אז ערליכע אידן זאלן האבן אן אייגענעם ווינקל אפגעזונדערט פון די גוי׳אישע גאסן, צו קענען מגדל זיין דורות ישרים, אויפן דרך המסורה לנו מאז ומתמיד.
דער זעלבער הייליגער שטאט פאר וועלכע מרן רביה״ק בעל ברך משה זי״ע האט אוועקגעגעבן מדם לבבו הטהור אז דאס זאל חלילה נישט גיין לטמיון, ווען ער האט שטענדיג געמוטיגט און געמאנט פון די הנהלת הקהלה והקריה צו זעהן און צו טון, אז דער וואוקס און בליה פון די שטאט, זאל אנגיין מיט א שטענדיגער גאלאפ, זאגנדיג אז דאס איז זיכער דער גרעסטער נחת רוח בגנזי מרומים וואס ער קען פארשאפן פאר רביה״ק זי״ע.
אט די זעלבע שטאט וועלכע האט די זכיה אז כ״ק רבינו הגה״ק שליט״א זאל שטיין אין שפיץ אלס דער מרא דאתרא פאר אזויפיל יארן, וועט יעצט שפאנען מיט א ריזיגע טריט פאראויס, ווען פרישע טויזנטער משפחות וועלן טרעפן אן ארט אויפצושטעלן בתים נאמנים לה׳ ולתורתו הקדושה, תחת דגלו והדרכתו.
עס בלייבט איבער מתפלל צו זיין און וואונטשען א ברכה, יה״ר שתשרה שכינה במעשי ידיהם, דער אייבירשטער זאל העלפן אז עס זאל נישט אונטערקומען קיין שום מכשול ותקלה, און בקרוב זאל מיר טאקע קענען מעלדן די נייעס אז ״כי עתה הרחיב ה׳ לנו ופרינו בארץ״, בהרחבת גבולי הקדושה.
