בטחון און די Law of Attraction

איך וויל דא שרייבן א נושא וואס איז בעצם א טיפע, לאנגע און פארצווייגטע נושא. איך ווייס נישט אויב איך וועל אלעס קענען דעקן, איך האב מורא אז איך וועל אויסלאזן אסאך פונקטן, אבער לא עליך המלאכה לגמור. איך וועל אנהייבן יעצט און איבער די צייט, מיט די הילף פון די חברים וועט מען צולייגן וואס עס פעלט.

The law of attraction

עס זענען דא אסאך ביכער טעיפס און ווידיאוס מוקדש צו ערקלערן דער א.ג. געזעץ, ווי אזוי עס ארבייט, און איר היסטאריע. אין קורצן זאגט עס אונז אז די מענטש איז מושך צו זיך און אריין אין זיין לעבן אלעס מיט זיין מחשבה און טראכטן. סיי גוטס און סיי שלעכטס. אויב טראכט ער גוטס וועט ער האבן גוטס און אויב טראכט ער שלעכטס וועט ער האבן שלעכטס.

History of the law of attraction

דער גאנצע נושא איז זייער פאפולער געווארן אין די לעצטע הונדערט יאר, ספעציעל ווען די באקאנטע נאפאליאן הילל האט ארויס געגעבן זיין בעסט-סעלער בוך Think and Grow Rich וועלכער איז באזירט אויף די יסודות פון דער געזעץ. עס איז נישט קלאר פון ווי דער איידיע שטאמט, מאנכע זאגן אז דאס שטאמט פון בודהא און פון אנדערע אור אלטע מיטל אזיע'שע קולטורן פון טויזנטער יארן צוריק. אני הקטן האלט (ווי איך וועל באלד ערקלערן מער באריכות) אז עס שטאמט פון די אור אלטע "אידישע קולטור".

How it works

עס זענען דא מערערע הסברים ווי אזוי עס ארבייט. די מערסט סייענטיפיק הסבר איז (כאטש עס איז קיינמאל נישט באשטעטיגט געווארן סייענטיפיקלי לפי ידיעתי) אז די וועלט איז פול מיט ענערגיע און די מח שיקט ארויס ענערגיע סיגנאלן. די פאזיטיווע סיגנאלן טרעפן אן די פאזיטיווע זאכן אינעם אטמאספערע און ברענגן עס צוריק צום מקור – דער מענטש. די זעלבע איז ווען מען שיקט ארויס נעגעטיווע סיגנאלן.

אין די ווידיאו און אין די בוך The Secret זענען זיי מסביר אז עס ארבייט אזויווי טעליוויזיע. ווען די דרוקסט אויף די רעמאוט קאנטראל א געוויסע נומער וועט די טעליוויזיע כאפן א געוויסע טשאנאל. וואס טוסטו אויב דו האסט נישט ליב דער טשאנאל? דאן דרוק אן אנדערע נומער וועט אויפקומען אן אנדערע טשאנאל. מיין נישט ווייל עס שפילט יעצט איין טשאנאל אויפן טעליוויזיע ביסטו סטאק דאס צו וואטשען. ניין, דו קענסט טוישן די טשאנאל. ווי אזוי? דורכן דרוקן אנדערע נומערן אויפן רעמאוט, דאס שיקט ארויס סיגנאלן צו די טעליוויזיע טראנפארטערס צו שיקן א ניי טשאנאל צו דיין באקסעלע.

די זעלבע איז מיט דיין לעבן. אויב האסטו א שווערע טאג היינט, איז עס בידך צו טוישן די מציאות פונקט אזוי גרינג ווי עס איז צו טוישן א טעליוויזיע טשאנאל. לויט די וואס גלייבן אין דעם, קען א יעדער מענטש האבן וואס ער וויל, ווילאנג ער קען טראכטן און גלייבן בשלימות אז ער האט דאס שוין. ווילסט זיין א גביר? טראכט און גלייב אז דו ביזט איינס וועסטו ווערן איינס. ווילסט ווערן דאר? מוזט נישט גיין אין דזשים, קענסט ווייטער פרעסן הערינג מיט קעיק, ווילאנג דו טראכסט און דו גלייבסט בשלימות אז דו ביזט דאר. איי וועסטו טענה'ן אז דו האסט געטרייט און עס האט נישט געארבייט? די תירוץ איז אז דו האסט נישט עכט געטוישט די טשאנאל, האסט נישט געגלייבט בשלימות.

א קליינע סברא מדעת עצמי

אויב א מענטש קען זיך קאנווינסען אז ער איז רייך וועט ווערן רייך. ווי אזוי? ווייל ווען א מענטש איז קאנווינסד אז ער איז רייך פירט ער זיך אויף ווי א גביר אטאמאטיש (ווייל אויב נישט, איז א ראי' אז ער איז נישט עכט קאנווינסד), און אויב ער פירט זיך ווי א גביר וועט ער דאך ארבייטן ווי א גביר. נו, אז מ'ארבייט ווי א גביר ווערט מען דאך א גביר. (נישט יעדער איז מסכים מיט דער סברא, דאס איז אן אייגנס.)

א יעדעס מענטש האט בעצם אינערליכע כוחות צו זיין א גביר. נאר וואס דען? געוויסע פאראדיימס קענען בלאקירן פארן מענטש צו טון וואס ער דארף צו טון ארויסצוברענגן די כוחות אל הפועל. אבער אויב קען ער טוישן די טשאנאל און זיך קאנווינסן אז ער איז א גביר, דאן פאלן דאך די אלע פאראדיימס אוועק און די אינערליכע כוחות קומען ארויס און ער ווערט טאקע א גביר. איי, וואס געשעהט פלוצלינג צו דעם גביר אז יארן שפעטער האט ער פארלוירן זיין פארמעגן? עפעס האט געמוזט געשעהן א קליינע זאך וואס האט אויפגעשאקלט זיין קאנפידענס און געטוישט זיינע געדאנקן צו נעגאטיוו און דאס האט געצויגן צו אים דאס ארימקיימט און אי-הצלחה. וכן הדין בכל עניני עוה"ז ואולי גם ברוחניות, דו"ק ותמצא.

אין פשוט'ע ווערטער ווערט עס אראפ געלייגט אזוי: thoughts produce emotions, emotions produce actions and actions produce results, וכנ"ל והבן.

פאקטן

אין אלע ביכער, ווי אויך די אינטערנעט איז דא פול מיט מעשיות פון מעטשן וואס האבן זיך אויסגעהיילט פיזיש נוצנדיג די law of attraction, מענטשן זענען געווארן רייך, פארלוירן און אראפגעהאלטן וואג און נאך.

לאמיר אייך ווייזן איין דוגמא וואס איך האב נארוואס בייגעוואוינט. איך פאר – פון צייט צו צייט - א לאנגע וועג צוליב ביזנעס באדערפענישן. איך האב מיך לעצטענס אפגערעדט פאר א קאלעגע אז איך ווייס נישט פארוואס אבער די וועג נעמט מיר זייער לאנג, עס איז אלעמאל דא טראפיק אין דער צייט וואס איך פאר. אויך נעמט מיר אלעמאל א פינף צען מינוט ביז איך טרעף פארקינג. זאגט מיר יענער אז אינטערעסאנט, ער פארט די זעלבע צייט ווי איך פאר, אויף די זעלבע וועג, און טראץ די טראפיק נעמט עס אים נישט אזוי לאנג. אויך טרעפט ער עפעס אלעמאל פארקינג ווי נאר ער קומט אן ביים דעסטינאציע. מיר האבן אפגעשמועסט ארויסצופארן די זעלבע צייט און קוקן אויפן זייגער און זעהן צו עס איז טאקע אזוי. די רעזולטאטן זענען געווען אז ער איז אנגעקומען א שיינע פאר מינוט פאר מיך און ער האט באלד געטראפן פארקינג. וואס איז פשט? ער האט זיך געזעהן אנקומען שנעל, איז ער אנגעקומען שנעל, ער האט זיך געזעהן טרעפן פארקינג באלד, וכך הווה. איך, פון די אנדערע זייט, האב אלץ געטראכט אז איך וועל זיכער זיין סטאק אין טראפיק, און איך וועל זיכער נישט טרעפן פארקינג, וכך הווה.

עטליכע quotes פון חוקרים פילזאפן און שרייבער

“What we are today comes from our thoughts of yesterday, and our present thoughts build our life of tomorrow: Our life is the creation of our mind.” – Buddha

“A man is but the product of his thoughts. What he thinks he becomes. – Gandhi”

“To acquire love, fill yourself up with it until you become a magnet.” – Charles Haanel

“The vast majority of people are born, grow up, struggle, and go through life in misery and failure, not realizing that it would be just as easy to switch over and get exactly what they want out of life, not recognizing that the mind attracts the thing it dwells upon.” - Napoleon Hill

“If you’re thinking of debt, that’s what you’re going to attract.” - Bob Proctor

עס שטימט מיט תורה ויהדות

די מהלך און טעאריע ווערט ארונטערגערוסן דורך אסאך חוקרים, די שטערקסטע טענה איז א מען קען דאס נישט אויפווייזן סייענטיפיש. די שאלה פאר אונז איז צו איז דאס אויסגעהאלטן ע"פ תורה. מיר זעהט אויס אז די law of attraction איז איינס און די זעלבע ווי בטחון. נישט קיין ברודער נישט קיין קוזין נאר דאס איז ער אליין.

קודם כל איז דער נושא נישט קיין נייעס ביי אונז אידן. "טראכט גוט וועט זיין גוט" מיינט לכאורה דאס. "סוף מעשה במחשבה תחלה" מיינט זיכער דאס, און עס ערקלערט אונז אויך אז מיר זאלן עס קענען זעהן בחוש.

יעדער וואס ליינט דא זאל כאפן א בליק ארום זיך און זעהן צו זיי קענען טרעפן איין זאך וואס איז דא דארט וואס האט זיך נישט אנגעהויבן מיט א מחשבה. עס איז נישטא אזא זאך! אויב איינער איז רייך האט ער עס געצויגן צו זיך רייכקייט דורך זיין מחשבה. איך האב נאך נישט געטראפן דער רייכער מאן וואס האט געלעבט מיטן מחשבה אז ער איז א לא יצלח, אדער אז זיין ביזנעס דיעל וועט אדורך פאלן. פארדעם זענען גבירים אסאך מאל זייער אראגאנט און איבער-קאנפידענט.

כדאי מיר זאלן קענען אריינטראכטן און זעהן צו דאס איז טאקע בטחון מוזן מיר קודם פארשטיין וואס איז דאס בטחון און ווי אזוי עס ארבייט?

המשך אין געציילטע מינוטן......




.

חלק ב'


בטחון מהו?

בטחון איז א גאר פארצווייגטע נושא, עס זענען דא זייער אסאך ספרים איבער דער נושא. אין די ראשונים איז משמע אז עס איז דא א מחלוקת אביסל וואס דאס מיינט. איך וועל נישט אריינגיין אין די מחלוקת'ן (דאס וועל איך לאזן פאר אנדערע צו שרייבן). איך וועל דא שרייבן ווי אזוי איך פארשטיי עס.

בטחון מיינט פארזיכערט און קאנפידענס. אויב איינער האט בטחון אז די אייבישטער וועט אים העלפן, מיינט עס אז ער איז הונדערט פראצענט זיכער אז עס וועט געשעהן, נישט ניין און נייציג פראצענט נאר הונדערט פראצענט. אויב איינער איז מובטח אז א געוויסע סגולה וועט העלפן מיינט עס די זעלבע. די זעלבע איז ווען א מענטש האט זעלבסט זיכערקייט.

די תורה זאגט אונז אז ווער עס האט בטחון איז א זיכערע געהאלפענע. הבוטח בה' חסד יסובבנו שטייט אן קיין תנאים. די איינציגסטע תנאי איז אז ער דארף זיין בוטח אויף הונדערט פראצענט. און ממילא אויב ער איז בטוח אז ער וועט ווערן רייך דארף ער בעצם גאר נישט טון מער ווי דעם.

בטחון און השתדלות

אין דעם פרט איז דא א שטיקל מבוכה. פון איין זייט זאגן מיר אז ווער עס איז בטוח וועט באקומען די זאך בלי שום ספק. פון די אנדערע זייט ווייסן מיר אז עס פארלאנגט זיך השתדלות. די ענטפער אויף די סתירה איז אז בעצם איז בטחון אליינס גענוג. די פראבלעם איז אבער, אויב די מענטש וועט נישט טון קיין שום השתדלות דאן איז כמעט נישט מעגליך אז ער זאל הונדערט פראצענט גלייבן אז ס'וועט געשעהן. ערגעץ אין זיין מח וועט אריינדרינגן א צל של ספק אז אפשר טוט ער נישט גענוג, און ממילא, היות זיין בטחון איז נישט בשלימות וועט עס טאקע נישט געשעהן. משא"כ אויב ער טוט זיין השתדלות דאן קען ער שוין צוקומען צו די שלימות'דיגע בטחון און ערשט דאן וועט עס געשעהן.

ממילא, צדיקים וואס האבן געגלייבט הונדערט פראצענט אז זיי וועלן האבן פרנסה פון די אייבישטער, אן דעם וואס זיי גייען ארבייטן, האבן געקענט זיצן על עבוה"ש יומם ולילה און זיי האבן געהאט פרנסה – אן השתדלות, ווייל זיי האבן עכט געגלייבט. איינער וואס איז נישט אין די מדריגה דארף טון אביסל השתדלות כדי ער זאל צוקומען צו זיין אינגאנצן פארזיכערט. און דער וואס איז א נעגאטיווע בעצם, אדער האט שוואכע קאנפידענס וועט אפילו השתדלות אויך נישט העלפן. ווייל ער וועט אלעמאל טראכטן אז ער טוט נישט גוט און דורכן טראכטן אזוי איז ער מושך צו זיך נישט גוט.

איינער וואס איז בטבע א סקעפטיק וועט קיין שום סגולות אים נישט העלפן, ווייל ער גלייבט נישט דערין. די סיבה פארוואס ער טוט די סגולה איז נאר ווייל ער וויל פרובירן זיין מזל, אבער בעצם גלייבט ער נישט אז עס וועט אים העלפן. די איינציגסטע עצה פאר אזא מענטש איז אדער צו טון ריכטיגע השתדלות און אזוי צוקומען צו זיין פארזיכערט, אדער צו גלייבן אז די באשעפער קען אים געבן די ישועה אן קיין סגולות אן אזוי ארום צו פילן פארזיכערט. פארדעם קען מען זעהן שטילע תמימות'דיגע מענטש (באבעס און פרויען) וואס ביי זיי העלפט יא סגולות, ווייל טאקע וויבאלד זיי זענען נאאיוו, מען קען זיי גרינג איבער רעדן, ווערן זיי פארגלייבט אינעם סגולה, זיי גלייבן און זענען פארזיכערט, באקומען זיי זייער מבוקש.

וצוונו על מצוות בטחון

קען מען מחייב זיין א מענטש צו האבן בטחון? די סברא זאגט אז נישט. קענסט צווינגען און הייסן א מענטש צו זיין פארזיכערט, אבער אז ער איז נישט פארזיכערט קען ער גארנישט טון דערוועגן. אויב אזוי וואס מיינט דאס ווען די ספרים הייסן ארבייטן אויף בטחון?

איינער פון די ראשונים (דאכצעך די רמב"ם) פרעגט שוין די קושיא לגבי די מצווה תמידית פון אהבת השם. ווי אזוי קען מען מחייב זיין א מענטש ליב צו האבן? קענסט דען צווינגען א מענטש ליב צו האבן באנאנעס? אויב האט ער נישט ליב קען ער גארנישט טון דערוועגן? פירט יענער אויס אז די מצווה איז נישט ליב צו האבן די אייבישטער. די מצווה איז צו ארבייטן דערויף. לערן די תורה, לערן די נושא פון יציאת מצרים, בחירת ישראל לעם הנבחר, קבלת התורה, דריי דיך ביי ערליכע אידן, טו זאכן וואס וועלן דיר צוברענגן צו אהבת השם. לעב מיט התבוננות, דאס איז די מצוה.

די זעלבע איז ביי בטחון. מען קען נישט צווינגען קיינעם צו זיין פארזיכערט. די מענטש קען אבער ארבייטען דערויף ווי פאלגענד:

ער קען לערנען די ספרים וואס זענען עוסק אין די נושא, ספעציעל חובת הלבבות שער הבטחון.

ארבייט אויף דיין התבוננות. זיך אינצידענטן וואס וועלן אנדייטן און אויפווייזן אז די באשעפער קען אלעס, אז בטחון העלפט וכו', חזר דיך איין די מעשיות ביז דו וועסט זיין אינגאנצן איבערצייגט.

ווען דו ביזט נישט הונדערט פראצענט זיכער אז עפעס וועט געשעהן, טראכט אריין וואס דו מיינסט וועט זיין די מניעה, און זעה אוועק צו נעמען דער מניעה. דאס וועט נישט מאכן אז דו זאלסט זיין א בעל בטחון אבער עס וועט יא מאכן אז דו זאלסט באקומען דיין מבוקש.

גוטע עקסערסייזעס:

סעלף טאלק. רעד צו דיר אליינס, רעד פאזיטיוו, זאג צו זיך אליינס א גאנצע צייט אז דו ביזט זיכער אז עס גייט געשעהן, אדער אז עס איז שוין געשעהן, פיר דיך אויף אזוי ווי עס איז שוין געשעהן, קאנטשעסלי טענה דיך מיט דיר אליינס ביז דו ווייזט דיך אליינס אויף אז עס וועט געשעהן. געדענק, פארזיכערונג ליגט אינעם סאבקאנטשעס חלק פו די מח, אבער מען מוז עס קאנטשעסלי אהין לייגן, און סעלף טאלק איז די וועג עס צו טון.

הייב אן מיט א קליינע זאך, ארבייט אויף דיר צו גלייבן אז דו וועסט עס באקומען. דו וועסט זעהן די רעזולטאטן און דאס וועט דיר געבן די קאנפידענס צו זיין פארזיכערט אין גרעסערע זאכן.

דאס איז פשט אינען מאמר העולם “success breeds success”. איינמאל וואס דו זעסט איינמאל ביי א קלייניגקייט אז בטחון האט דיר עס געברענגט וועט עס דיר געבן די קאנפידענס צו גלייבן ביי גרעסערע זאכן און אזוי ווייטער ביזן ווערן א פולקאמער בעל בטחון. און די זעלבע איז אויך פארקערט ביי נעגאטיוו, מען דארף זיין געווארנט.

טיילן דעות בנוגע בטחון

א איד רעדט זיך אויס דאס הארץ אז די פרנסה גייט אים שווער, ער מיינט אז ער דארף אפשר ארבייטן מער שעות. די צדיק ענטפערט אים "דו דארפסט נישט ארבייטן מער שעות, דו דארפסט האבן מער בטחון". דער איד גייט ארויס מיט א קלארע פסק אז ער דארף נישט ארבייטן מער, די באשעפער וועט שוין העלפן. למעשה, איז אריבער א וואך/חודש/יאר און אלעס איז די זעלבע. פארוואס? ווייל בטחון איז נישט א זאך וואס מען קען אנצינדן מיט א סוויטש. אדער האט מען עס אדער נישט. מען קען יענעם זאגן צו ארבייטן אויף בטחון אבער דערווייל ווילאנג ער שפירט זיך נישט פארזיכערט דארף ער צולייגן מער שעות, ווייל נאר אזוי וועט ער זיך יעצט פילן פארזיכערט.

נאך מער, א געוויסע פראצענט פון בטחון איז געוואנדן אין די נאטור פון די מענטש מיט וואס ער ווערט געבוירן דערמיט. והא ראי' מענטשן וואס זענען בטבע מער גאליבעל, זענען גרעסערע בעלי בטחון, משא"כ מענטשן וואס זענען בטבע טראכטער, דו"ק ותשכח.

מבחן צו זעהן וואו מען האלט מיט בטחון

ווי אזוי קען מען וויסן אויב מען האט די ריכטיגע בטחון אדער עס איז בלויז אן איינרעדעניש וואס מען זאגט זיך צו מאכן פילן בעסער? די מבחן איז פשוט. אויב געשעהט די זאך וואס מען האט געוואלט און זיך פארלאזט אז עס וועט געשעהן, איז א סימן אז ער האט געהאט די ריכטיגע בטחון, אויב נישט איז א סימן אז מען האט נאך אויף וואס צו ארבייטען. אזוי שטייט אין שער הבטחון.

וויפיל השתדלות

וויפיל השתדלות דארף מען מאכן? איך האב געזעהן עטליכע היינטיגע מחברים וואס פרובירן צו ברענגען ראיות פון מאמרי חז"ל וויפיל אדער ווי ווייניג השתדלות מען דארף מאכן. זיי ברענגען ראיות פון תנאים, אמוראים, ראשונים און צדיקי דורות האחרונים. די אמת'ע תשובה איז אז א יעדע מענטש דארף מאכן השתדלות געוואנדן אויף זיין מדריגה אין בטחון. געוויסע מענטשן וועלן מוזן ארבייטן אכציג שעה א וואך אין די היצן און קעלט און דאס הייסט השתדלות פאר זיי, און ביי געוויסע מענטשן איז די בטחון זעלבסט גענוג השתדלות. נאך אמאל, ס'נישט שייך צו זאגן ביי דעם א געמאסטענע שיעור פאר א כלל פון מענטשן.

סוף דבר

די ספרים און ביכער וואס רעדן און יאווענען זיך אין די נושא פון די law of attraction זענען נישט מער ווי אינטרעסאנטע שיעורים אין די נושא פון בטחון. איי וועט איר פרעגן פארוואס דארף מען די law of attraction אויב האט מען שוין די חובת הלבבות? די ענטפער איז אז מען דארף טאקע נישט, נאר היות די מידת הבטחון איז א שווערע זאך קונה צו זיין, און מיר קענען נוצן סיי וועלכער הילף עס איז נאר מעגליך, איז דאס נאך א tool וואס וועט אונז ארויסהעלפן אנקומען צו דעם. ועוד, זיי צונעמען עס מער אויף אן אויפן וואס רעדט צו די היינטיגע המון עם, און נוצן די היינטיגע ביישפילן. (איך האב שוין געטראפן כאטש איין ספר בעניני בטחון וואס שרייבט נאך גאנצע שטיקער פון זייערע ביכער, אן געבן קרעדיט פארשטייט זיך.) דריטענס, זיי זענען מסביר ווי אזוי עס ארבייט בדרך הטבע וואס ביי דעם איז שוין שייך די חכמה בגוים תאמין.

נאכן ענדיגן שרייבן דער ארטיקל האבן איך עס איבערגעליינט און געזעהן אז עס איז דא אסאך וואס איך האב נישט געשריבן, ובעיקר אז אסאך זאכן זענען שיטות וענינים וואס איך בין נישט הונדערט פראצענט זיכער דערמיט. איך האף אז עס וועט זיך אנטוויקלען דא א פיינע שמועס, און דורך די דיבוק חברים וועל איך אליינס ארויס קומען קלארער אין די נושא.



.

איך בין לעצטענס אנגעקומען צו א שטיקל רבי צדוק ז"ל וואס האט מיר אויסגעזעהן אז ער האלט אויך אז בטחון ארבייט ממש ווי די law of attraction. ער דערמאנט נישט די ווארט בטחון אבער עס זעהט אויס גאנץ קלאר אז ער האלט אז ווען איינער איז שטאק חושק צו עפעס און ער איז זיכער אז ער וועט עס באקומען וועט ער עס טאקע באקומען. איך האב עס געטראפן אין עטליכע פלעצער אבער איך וועל דא צוצייכענע דריי. וזה לשונו:

החשק יש לו הכח לפעול אותו דבר שהוא משתוקק לו הרבה אפילו היא רע, כענין בדרך שאדם רוצה לילך וכו', מצד הרצון שלו פועל אפילו כל חמדת עוה"ז אם לא יהיה דבר מעכב שבמשפט אין מגיע לו זה ומונעין ממנו מה'. לולא זה ע"י החשק היה משיג כל מה שחושק.... וכפי תוקף התגברות כח החשק כך הוא משיג וכו'. (צדקת הצדיק אות רמ"ט)

דאס איז מורא'דיג אינטערעסאנט. מען קען האבן וואס מען וויל, מען דארף נאר שטארק וועלן!

הניצוח אדם לאדם היא ג"כ כפי 'גודל החשק' של אדם בניצוח, אם מתגבר מאוד (חשקו) אז הוא גובר, אם הם אך שוים במדת המשפט. (הנ"ל אות ר"נ)

עס איז משמע דא אז אפילו א שוואכערע מענטש קען גרינגערהייט באזיגן א שטארקע מענטש ווילאנג זיין חשק איז שטערקער ווי יענעמ'ס.

על כל מיני ישועות של הש"י לאדם יש בעתה ואחישנה, זכו אחישנה לא זכו בעתה. ובעתה, היינו שכבר חסר לו הדבר והוא צמא ומשתוקק ונצרך לה.... לזה זוכה כל נפש מישראל, אף הלא זכה. שבעתה (היינו כשמשתוקק וצמא להישועה) מזמין לו הש"י ישועה. ואם יראה שאין מזמין, זה לאות שעדיין אין צריך לה ויוכל להיות בלתה. (הנ"ל אות נ')

קוקט'ס יעצט איבער די שמועס אין די אנהייב פון די אשכל וועט איר זעהן אז עס איז גאנץ ענליך און שטארק מסתבר אז מען רעדט פון די זעלבע זאך. אבער ווי שוין פריער ערווענט האבן די סגולות א clause ווי אזוי די פארשטייער זאלן זיך אלעמאל קענען ארויסדרייען און נישט קענען ווערן געהאלטן פאראנטווארטליך, אזוי ווי רבי צדוק אליינס שרייבט: "מיט חשק קענסטו באקומען וואס דו ווילסט, און אויב האסטו עס נישט באקומען איז א סימן אז דו האסט נישט חושק געווען גענוג שטארק". (וזה חוץ ממה שכותב שהכל בנאי שאין משפט נגדו בשמים.)


.

zurich

מיר קיקט אביסל אויס ווי די גאנצע לוו אפ עטרעקשיאן איז אן עבודה זרה, און די איידוע וואס דו זאגסט הוגה אז זיי נעמען עס פון די יודישע קאנסעפט פון בטחון, מיינט אויך נישט גארנישט,ווייל דו קענסט זאגן אויף יעדע רעליגיע אז זיי נעמען די איידיעס פון די יודישע רעליגיע, ממילה מעיג מען עס דינען? ס'קען אויך זיין אז ס'העלפט טאקע, מיט דעים אלעם טאר מען זיך לכאורה נישט באניצן דערמיט! און חז"ל זעה מיר אסאך מאל אז מען האט זיך "געקענט" היילן מיט אן עבודה זרה ואסרו חכמים, איז דא נישט אנדערש! עבודה זרה מיינט דינען עפעס אנדערש חוץ גאט, מפארלירט די גאנצע ווארימקייט צום אייבערשטען, איך דארף שוין נישט דאווענען אז איך זאל זיין געזינט,פרנסה,שידוכים,שלום בית,קינדער, די לוו אפ עטרעקשיאן וועט שוין קערנעמען...... די יונעווערס וועט מאכן די דזאב.......... עפ"ל

פרעגסט א גוטע שאלה רבי זרח (@zurich). איז אזוי. אויב רעדסטו בנוגע "הלכות ע"ז" איז דאך זיכער נישט קיין שאלה, לערן די הלכות וועסטו זעהן אז דאס האט מיט ע"ז אזוי ווי אן אוגערקע האט מיט דינא דבר מצרא. איך בין זיכער אז דו האסט ענדערש געמיינט פון א געפילישע שטאנדפונקט אז ס'זעהט אויס און פילט נישט אידישלעך, אז ס'האט א ריח פון כפירה וכדומה. קודם כל, קענסטו דאך פרעגן די זעלבע קשיא אויף די צדקת הצדיק וואס איך האב אויבן ציטירט, עיי"ש. לויט די צדקת הצדיק קען א מענטש אויך זאגן אז איך דארף שוין נישט דאווענען אז איך זאל זיין געזינט,פרנסה,שידוכים,שלום בית,קינדער, די "חשק" וועט שוין קערנעמען.

אבער מען קען פארענטפערן דיין קשיא מיט די באקאנטע משל. א מענטש האט אמאל געדארפט טרעפן א מענטש פאר א מאלטי מיליאן דאלערדיגע ביזנעס דיעל, דערווייל רוקט זיך אונטער די צייט פון די מיטינג און ער קען נישט טרעפן אן ארט צו פארקן די קאר. ער קען עס נישט גלייב אז צוליב א פארקינג ספאט וועט ער פארלירן מיליאנען דאלארן. פארנדיג ארום די ארומיגע גאסן שעפשעט ער זיך אונטער א ווארימע תפלה צום באשעפער פול מיט הבטחות אז ער וועט געבן געלט פאר צדקה, לערנען מער, זיין מער נזהר בשמירת עינים וכדומה, און אזוי שעפשענדיג די הבטחות זעהט ער ווי איינער פארט ארויס און עס איז דא א פלאץ פאר אים. גיבט ער זיך א רוף אן, "פארגעט איט באשעפער, ס'איז אקעי, איך האב שוין איינס".

דער מענטש האט נישט געיכאפט אז די באשעפער איז דער וואס האט מסבב געווען אז דער מענטש זאל פונקט יעצט ארויספארן. די זעלבע איז מיט די לאו אוו אטראקשען, די זעלבע איז מיט רבי צדוק'ס "חשק" און די זעלבע איז מיט אלע סגולות. א יעדע רעכטדענקיגע מאמין פארשטייט אז דאס אליינס האט אונז די באשעפער געגעבן, די חשק, די צמאון און די אטרעקשאן איז א מתנה פון גאט.


.